Coast Guard, regular nga magahimo sang vessel safety inspection sa mga pumpboats agud masiguro nga matuman ang mga kondisyon sang MARINA

By: JoMaque | August 14, 2019, 8:45am

Iloilo City — Istrikto nga ipatuman sang Coast Guard ang mga kondisyon sang MARINA antes pasugtan nga makabiyahe ang mga pump boats halin Iloilo City pa-Guimarsa vice versa.

Pahayag ini ni Captain Erlinda Benliro, OIC sang Coast Guard Iloilo Station, matapos temporaryo nga gin-lift sang MARINA ang suspension sa biyahe sang mga pump boats sugod kahapon, Agosto 13.

Ginpahayag ni Benliro nga regular sila nga magahimo sang vessel safety inspection sa mga pumpboats agud masiguro nga matuman ang mga pagsulundan.

Nabutang sa memorandum sang MARINA nga pasugtan lang nga makabiyahe ang pumpboat kon maayo ang tiyempo; nakasuksok sang life jacket ang mga pasahero sa tanan nga tiun; 75% lang ang passenger capacity; na-baruron ang trapal sang pumpboat kag ang tanan nga motorbancas ang may distress signal equipment.

Dapat man magsulat sang ila matuod nga ngalan sa manifesto ang tanan nga pasahero lakip na ang mga bata kag halin las 6 sa aga tubtub las 6 sa gab-i ang operations.