ArchivesLokal

’Miscommunication,’ rason sang Coast Guard Western Visayas official kon ngaa wala nakatambung sa legislative inquiry sang SP Guimaras angut sa Iloilo Strait tragedy

By: Aine Grace Bravo | August 15, 2019

via Aksyon Hotline

Iloilo City – May miscommunication nga natabu kon ngaa wala nakatambong ang Coast Guard sa legislative inquiry sang Sangguniang Panlalawigan sang Guimaras kahapon angut sa Iloilo Strait tragedy sang Agosto 3.

Suno kay Commodore Allan Victor Dela Vega, district commander sang Coast Guard-Western Visayas, lain ang ginpadal-an sang imbitasyon sang SP Guimaras gani wala sila sang representante nga nag-abot.

Ginpahayag ni Dela Vega nga wala siya sang may nabaton nga imbitasyon halin sa SP Guimaras kag nagdungan man ang legislative inquiry sang Iloilo City Council gani ini ang ila gintambungan.

Kaina sang aga lang nahibaluan ni Dela Vega nga nakabaton sang imbitasyon para sa inquiry si Commander Perlita Cinco, ang gin-relieve nga commander sang Coast Guard Iloilo Station kasunod sang trahedya.

Nagpadala naman suno sa iya sang sulat si Cinco kay Guimaras Vice Governor John Edward Gando nga indi siya makatambong sa inquiry bangud ginhambalan siya sang legal officer sang PCG nga ginapa-idalum siya sa imbestigasyon.

Gin-athag ni Dela Vega nga handa man siya nga magtambong sa inquiry sang SP Guimaras kon napahibalo siya.