Vendor sa Arevalo, ginlampusan sa ulo sang kasubong niya nga manugbaligya sang isda

By: JoMaque | August 15, 2019, 11:30am

Iloilo City –Napilasan sa ulo ang fish vendor sa Arevalo Public Market nga si alyas Shiela matapos siya ginlampusan sang botelya sang softdrink sa ulo sang kapareho niya nga manugbaligya nga si alyas Cecilia.

Nag-ugat ang away sang duha sa utang ni Shiela kay Cecilia nga nagalab-ut sa P14,000.

Naghisugot ang magtimbang nga kampo nga mabayad si Shiela sang P200 kada adlaw tubtob nga maimpasan ang utang.

Kaina suno kay Cecilia, naghambal ang bana ni Shiela nga P200 ang ibayad sa iya pero sang nagkadto na siya sa puwesto ni Shiela, P100 lang ang ginhatag sa iya.

Ginka-akig ini ni Cecilia kabangdanan ginkuot niya ang P100 sa bintahan ni Sheila.

Naakig man si Shiela sang ginkuotan ni Cecilia ang iya bintahan nga wala nakalisenya.

Suno kay Cecilia, ginwahig ni Shiela ang mga isda kag gintiklod siya. Madamo suno sa iya sang nakakita sang nagkaya-kaya siya. Ginbutong pa ni Shiela ang iya nga bayo.

Nakita ni Cecilia ang botelya sang softdrink sa lamesa kabangdanan iya ginkuha kag ginlampos sa ulo ni Shiela. Napilasan si Shiela sa ulo.

Magluwas kag Cecilia, ginreklamo man ni Shiela ang bana sini bangud sang ginpahayag pagwasiwas sang kutsilyo samtang naga-away sila nga mga babaye.

Ginpahayag naman ni Cecilia nga indi ini matuod.

Nagpa-blotter si alyas Shiela kag ginpadakup si Cecilia kag ang iya bana.