‘We are quite disappointed’ –Guimaras Vice Governor sa indi pagtambong sang PCG kag MARINA sa ila legislative inquiry angut sa Iloilo Strait Tragedy; Iloilo City Council, wala nagpahibalo sa gin-conduct nga inquiry

By: JoMaque | August 15, 2019, 9:55am

Guimaras — Disappointed si Guimaras Vice Governor John Edward Gando sa kapaslawan sang Philippine Coast Guard (PCG) kag Maritime Industry Authority (MARINA) nga makatambong sa legislative inquiry nga ginpatawag sang Sangguniang Panlalawigan sang Guimaras kahapon, Agosto 14.

Suno kay Gando, nagpadala sila sang communication sa duha ka ahensiya sang gobierno sang nagligad nga semana.

Nagpahibalo suno sa iya ang taga- MARINA nga indi makatambong sa inquiry bangud may yara sila sang prior commitment sa legislative inquiry nga himuon naman sang Iloilo City Council, samtang wala sang sabat halin sa PCG.

Nagtambong sa inquiry ang pila ka mga survivors, sakayanon, first responders sa Iloilo Strait tragedy kag iban pa kag nakuhaan sila sang mga testimoniya.

INQUIRY SANG ILOILO CITY COUNCIL

Nag-conduct sang legislative inquiry ang Iloilo City Council angut sa trahedya nga ginhiwat kaina man sang aga.

Ginpahayag ni Gando nga kahapon lang siya ginpahibalo nga may himuon man nga inquiry ang Iloilo City Council.

Nagpabutyag ang bise gobernador nga kuntani gilayon sila ginpahibalo agud isa lang ka imbestigasyon ang ila himuon sa katuyuan nga indi matunga ang mga resource persons.

Ang inquiry sang Iloilo City Council ang ginprayoridad sang taga-MARINA kag bisan sang taga-PCG rason nga wala nakatambong sa inquiry sang SP sang Guimaras.

Handa man kuntani ang SP Guimaras nga isulon ang schedule sang ila inquiry kon ginpahibalo sila sang Iloilo City Council.

Kadamuan sa mga survivors ang taga-Guimaras kag tanan nga mga crew ang naga-istar man sa isla.

NA-ESTABLISH SA INQUIRY SANG SP GUIMARAS

Bisan wala nakatambong ang taga-PCG kag MARINA, may yara sang mga na-establish ang Guimaras SP sa natabu nga trahedya base sa panaysayon sang mga survivors, sakayanon kag iban pa.

Na-establish nila suno kay Gando nga makanay ang kadagatan sang ginpasugtan sang PCG ang MB Chi-Chi, MB Keziah kag MB Jenny Vince nga makabiyahe sang Agosto 3. Pero hinali lang nga nagbaskog ang hangin sa lawod rason nga nagkulob ang mga pump boats.

Nagpabutyag man ang mga survivors nga nagpanikasog ang mga crew nga maluwas ang ila mga pasahero.

Ginabanta 30 minutos, nag-abot ang taga-PCG sang nagkulob ang MB Chi-Chi kag MB Keziah, samtang kapin isa ka oras sila nga nag-responde sang nagkulob ang MB Jenny Vince.

Dugang pa ni Gando, na-establish man nga nagpangdawat lang ang taga-PCG sang mga pasahero nga ginluwas sang mga sakayanon kag nagpanghaboy lang sang salbabida sa baylo nga sila ang magsalom.

Bastante na suno sa bise gobernador ang ila nakuha nga mga impormasyon angut sa natabu kag wala na sang himuon pa nga legislative inquiry.

I-rekomendar sang SP sa Ombudsman nga pasakaan sang kaso administratibo ang mga katapo sang PCG nga naka-duty sang Agosto 3.