Guimaras Rep. Ma. Lucille Nava, mahingyo sang Congressional Inquiry angut sa Iloilo Strait tragedy

By: Aine Grace Bravo | August 16, 2019

via Aksyon Hotline

Guimaras — Ma-file sang resolution si Guimaras Representative Ma. Lucille Nava nga magahingyo sang Congressional Inquiry sa Iloilo Strait tragedy sang Agosto 3 nga nagbilin sang 31 ka napatay.

Ini ang masunod nga tikang sang Guimaras LGU kasunod sang legislative inquiry sang Sangguniang Panlalawigan sang Agosto 14.

Suno kay Nava, ginahulat na lang niya resolution sang SP agud ma-file niya ang resolution para sa Congressional Inquiry.

Gin-athag sang kongresista nga ginhatagan niya sang kahigayunan ang Philippine Coast Guard nga makapaathag sa natabu.

Sa pagkamatuod suno sa iya, nagpadala siya sang sulat sa Coast Guard Iloilo sang Agosto 5 nga nagapangayu sang incident report, pero wala gid sang sabat.

Ginfollow-up niya ini sang Agosto 14 kag kahapon lang nakasabat ang natungdan nga ahensya.

Wala man nakapakita ang taga-Coast Guard sa inquiry sang SP.

Sang Agosto 13, nagpautwas sang iya sentimiyento si Nava angut sa trahedya paagi sa privilege speech sa Kamara.