Publiko, indi dapat magkampante bisan naganubo na ang dengue cases sa Iloilo – DOH 6 official

By: Aine Grace Bravo | August 16, 2019

via Aksyon KhenJo Terco

Iloilo City — Nagnubo ang kaso sang dengue sa siyudad kag probinsya sang Iloilo. 

Pero suno kay Dr. Jessie Glen Alonsabe, epidemiologist sang Department of Health (DOH 6), indi dapat makampante ang mga pumuluyo kag dapat magpadayon gihapon sa pagpanglimpiyo sang palibot agud maguba ang mga lugar nga ginapangitlogan sang lamok nga nagadala sang dengue. 

Base sa pinakaulihi nga record, naglab-ot lang sa 266 ang bag-o nga dengue cases sa siyudad sa sulod sang isa ka semana. 

Samtang, 538 naman ka mga dengue patients ang na-admit sa mga district hospitals sa probinsya sang Agusto 15, manubo ipaanggid sa 1,128 nga record sang Hulyo 1.

Gin-athag naman ni Alonsabe nga all year round gihapon ang kampanya sang DOH kontra dengue kag ginhingyo ang kooperasyon sang tanan sa pagpabilin sang kalimpyo sang palibot agud maguba ang mga breeding places sang lamok.