(UPDATE) JO1 nga nakatiro patay sa Btac. Viejo, ginpasakaan na sang kaso

By: Aine Grace Bravo | August 16, 2019

via Aksyon Jeremy Brian Valle

Barotac Viejo, Iloilo — Ginpasakaan sang kaso nga murder kag attempted murder sa Provincial Prosecutor’s Office ang jail officer nga nagtiro patay sa Barotac Viejo sang Agosto 14 sang gab-i.

Gintudlo si JO1 Ryan Tupas, 35 anyos sang Sitio Baclayan, Brgy. San Juan, Barotac Viejo kag assign sa BJMP Barotac Viejo, nga nagtiro kay Ernesto Pescador Jr, 49 anyos sang Brgy. Vista Alegre, Barotac Viejo, nga may igo sa dughan kag likod.

Napatay si Pescador samtang ginabulong sa Western Visayas Medical Center pasado alas-8 kahapon sang aga, Agosto 15.

Magluwas kay Pescador, gintuyo man tiruhon ni Tupas si Jay Unabia, 26 anyos sang Brgy. Poblacion, Barotac Viejo, nga nobyo sang bata ni Pescador pero wala naglupok ang pusil.

Ginpahayag naman ni Tupas nga indi niya hungod nga tiruhon si Pescador.

Sa imbestigasyon ni Police Major Ciriaco Esquilarga, hepe sang Barotac Viejo Police Station, posible na-tripingan sang suspek ang biktima bangud wala man sang pagbaisay ukon inaway nga natabu antes ang insidente.

Indi naman mabaton sang asawa sang biktima nga si Mrs. Josephine Pescador ang pagkapatay sang iya bana. May lima ka bata ang mag-asawa kag lima ka tuig pa lang ang kamanghuran.

‘MA-IMBESTIGAR ANG BJMP’

Ma-conduct sang separado nga imbestigasyon ang Bureau of Jail Management and Penology 6 angut sa ginkadalahigan nga krimen ni JO1 Tupas.

Suno kay Senior Jail Officer 3 Leo Laserna, chief sang Investigation and Prosecution Division sang BJMP-6, sakop nila ang pagpasaka sang kaso administratibo kay Tupas.

Kaina sang aga, nagpadulong siya sa Barotac Viejo agud magtipon sang mga ebidensiya nga ila gamiton sa imbestigasyon kag nagpakig-angut sa kapulisan kag pamilya sang biktima.