Call center agent, patay sang gintiro sang riding-in-tandem sa Taft North, Mandurriao

By: JoMaque | August 17, 2019, 11:39am

Iloilo City — Isa ang patay, isa pilason sang gintiro sang riding-in-tandem sa Taft North, Mandurriao kagab-i, Agosto 16.

 Dead-on-arrival sa Western Visayas Medical Center ang call center agent nga si Mark Muller, 38 sang Cuartero, Jaro, bangud sang pilas sa ulo kag iban pa nga parte sang iya lawas.

May pilas naman sa tiil si Christopher Jinon, 32 sang Bularan, Banate nga padayon ginabulong sa ospital.

Suno sa isa sa mga nakakita sa insidente, nagapangihi sa pader si Muller samtang nagalakat paguwa sa eskinita si Jinon.

Nakita niya nga nagdulog ang scooter-type nga motorsiklo, nagpanaug ang angkas kag gintiro si Muller.

Posible suno sa nakakita nga gintiro man si Jinon bangud nasal-an siya nga kaupod ni Muller.        

Wala sang nakakilala sa mga suspek nga madasig nagpalagyo bangud may tabon ang ila nawong.