May 23, 2022

Guimaras Local Government, ma-request sang Congressional inquiry sa Iloilo Strait tragedy

Read Time:2 Minute, 43 Second

By: Aine Grace Bravo | August 19, 2019

via Aksyon Hotline

Guimaras –Magapanawagan para sa congressional inquiry ang local government unit sang Guimaras sa August 3 sea tragedy nga nagbilin sang 31 ka patay.

Suno kay Guimaras Vice Governor John Edward Gando, indi anay nila pag-ipasa sa Ombudsman ang mga records kasunod sang ginhimo nga legislative inquiry sang Sangguniang Panlalawigan sang Agosto 14 samtang nagahulat sang feedback sa ila panawagan.

Ang inquiry nagtutok sa ginhimo sang Philippine Coastguard sang natabu ang trahedya.

Base sa testimonya sang mga suvivors, masobra 30 minutos nga nag-abot ang taga-Coastguard matapos nagkulob ang MB Chi-chi.

Masobra naman isa ka oras antes sila nakaabot sang sunod nga nagkulob ang MB Jenny Vince.

Magluwas dire, isa lang sa taga-Coastguard ang naglumpat sa tubig. Ginkilala ni Gando kay Coastguard Padua ang naglumpat nga PCG personnel.

Ginpahayag sang mga survivors nga “namunpon” lang sang mga pasahero nga na-rescue sang mga sakayanon ang taga-Coastguard kag naghaboy sang life ring. Ang iban nga taga-Coastguard suno sa mga survivors, nag-“picture” lang kag ang iban nagapanigarilyo pa.

INDI NA MAG-COMPARE NOTES

Indi naman mag-compare notes ang Guimaras Sanggunian sa Iloilo City Council nga naghimo man sang separado nga inquiry sang Agosto 14.

Wala na sang masunod nga imbestigasyon ang Guimaras samtang magapatawag pa sang mga inquiries ang Iloilo City Council.

Magluwas sa pila ka text messages halin kay Iloilo City Councilor Lady Julie Grace Baronda nga nagapabutyag nga indi nila intensyon nga dunganan ang legislative inquiry sang Guimaras sang Agosto 14, wala na suno kay Gando sang iban pa nga koordinasyon sa tunga nila sang konseho sang siyudad.

PAGBISITA SANG ANAY PCG ILOILO COMMANDER 

Wala nakatambong sa legislative inquiry sang Sanggunian si anay PCG-Iloilo Commander Perlita Cinco bisan pa may ginpadala nga sulat sa iya.

Gin-relieve si Cinco matapos ang trahedya.

Suno kay Gando, nagbisita sa Guimaras si Cinco sang Biyernes kag nagpa-athag nga wala siya intensyon nga bastuson ukon balewalaun ang inquiry sang Sanggunian.

Nagpadala man sang sulat si Cinco sang Agosto 15, isa ka adlaw matapos ang inquiry.

Nagpadala naman sang sulat si Gando sa PCG kag naghingyo sang listahan sang mga personnel nga naka-duty kag nagresponder sa trahedya pero wala pa napadala sa iya ang mga pangalan.

IPAIDALUM SA TRAINING ANG MGA SAKAYANON

Sa Sanggunian inquiry, natukiban suno kay Gando nga kulang sa logistics kag kapasidad ang mga personnel sang PCG.

Samtang agud indi na masulit ang natabu, dapat suno kay Gando nga ipaidalum man sa trainings ang mga sakayanon agud mahibaluan nila ang dapat himuon kun may kapareho nga insidente.

MGA KUNDISYON SA BIYAHE SANG MGA PUMPBOATS

Gin-ako ni Gando nga nanibag-o gid ang mga Guimarasnon sa mga kundisyon nga ginpatuman sang ginpasugtan nga liwat makabiyahe ang mga pumpboats.

Pero ginatinguhaan nila ini nga hangpon kag nagpasalamat na lang sila nga ginpasugtan nga makabiyahe ang mga sakayan.

Nagapati si Gando nga temporaryo lang ini nga setback para sa Guimaras.

Handa man suno sa iya ang mga operators sang pumpboats nga mag-upgrade sang ila sakayan.

Isa lang sa gina-ayo sang mga taga-Guimaras suno kay Gando amo nga buklaron lang anay ang trapal samtang nagahulat nga mapuno ang pumpboat kag lukuton lang kun manuglarga na.

Happy
Happy
0 %
Sad
Sad
0 %
Excited
Excited
0 %
Sleepy
Sleepy
0 %
Angry
Angry
0 %
Surprise
Surprise
0 %
Previous post Pag-grant sang korte sa application sang MORE sa issuance sang writ of possession sang PECO, wala basehan, illegal kag unconstitutional – PECO lawyer
Next post Driver, salesman sang distributor sang sigarilyo, ginhold-up sa San Enrique