Kaso sang dengue sa Western Visayas, nagnubo; publiko, indi dapat magkampante – DOH 6

By: Aine Grace Bravo | August 19, 2019

via Aksyon KhenJo Terco

Iloilo City — Nagnubo ang kaso sang dengue sa Western Visayas base sa pinakaulihi nga record nga ginpaguwa sang Department of Health (DOH).

Halin January 1 tubtob August 10 subong nga tuig, 1,932 ka bag-o nga kaso nga na-record ang DOH sa Rehiyon VI.

Mas manubo ini ikumpara sa na-record halin January 1 tubtob August 3 nga may 3,080.

Pila sa mga ginatan-aw nga rason sang DOH sa pagnubo sang kaso amo nga fully-aware na ang publiko sa dengue kag ang mga clean-up drives nga gina-conduct.

Sa subong, naglab-ot na sa 36,117 ang kaso sang dengue sa Western Visayas.

Nagapanguna gihapon ngamay pinakamadamo nga kaso ang Iloilo province nga may 15,028; nagapangaduha ang Negros Occidental nga may 5,491 kag pangatlo ang Capiz nga may 5,019.

Samtang naglab-ot naman sa 164 ang mga nagkalamatay nga may 14 ka bag-o nga na-record.

Bisan nagnubo ang kaso sang dengue, indi dapat magkampante ang publiko suno sa DOH.

Dapat nga ipabilin gihapon ang kalimpyo sang palibot agud nga maguba ang mga breeding places sang mga lamok nga nagadala sang dengue virus.

Indi lang basta-basta nga magpanilhig kundi dapat hibalu-on gid ang mga lugar nga pwede pangitlogan sang lamok kag gub-on.