Pusil sang guwardiya sa Iloilo Fastcraft Terminal, aksidente nga naglupok; Pasahero nga nagapila, naagsikan ang ginapatihan baseyo sang bala

By: JoMaque | August 19, 2019, 10am

Iloilo City — Aksidente nga naglupok ang service firearm sang security guard sa Iloilo Fastcraft Terminal sa Lapuz las 5:30 subong nga aga.

Suno kay security guard Mar Rufino sang Magnet Rod Security Agency, nakasulod sa iya bag ang .9mm nga pusil matapos siya nag-chamber load kagab-i.

Sang ginsulod ni Rufino sa holster ang pusil kaina sang aga, gulpi lang ini nga naglupok.

Yara sa atubang sang ginagawaran sang ticket nakapuwesto si Rufino sang aksidente nga naglupok ang pusil.

Ginpahayag ni Rufino nga gin-release niya ang magazine sang pusil kag ginkasa sa pagpati nga wala na ini sang bala.

Pero gulpi naman ini naglupok sang gintongtong niya sa lamesa.

Naagsikan sang ginapatihan nagtabog nga baseyo sang bala ang nagapila nga pasahero nga si Mrs. Cerconie Castilla, 42 sang Barotac Nuevo.

Suno kay Castilla, naghapdi kag nagpula ang ibabaw nga parte sang wala niya nga paa pero maayo naman ang iya kondisyon.