Staff ni Councilor Jay Treñas, ginbuno patay sa La Paz

By: Aine Grace Bravo

via Aksyon Angel Mae Ciudad

Iloilo City — Ginbuno-patay ang 42-anyos nga lalaki sa Cuadra Street, Barangay Jereos, La Paz alas-11:22 kagab-i, Agosto 19.

Ginkilala ang biktima kay Jephrey Solano sang amo man nga lugar apang temporaryo nga nagapuyo sa San Isidro, Jaro. Si Solano ang staff ni Iloilo City Councilor Jay Treñas.

Suno kay Police Senior Master Sergeant Alain Selda, imbestigador sang La Paz Police Station, pauli na ang biktima sakay sa iya motorsiklo sang ginbanggaan sang suspek nga si Rene Bebedor, 56-anyos.

Indi magnubo sa napulo ang pilas sang biktima nga gindala pa sa ospital apang napatay.

Suno sa testigo, nagapakitluoy ang biktima samtang ginabuno sang suspek.

Away sa duta ang isa sa mga ginasunod nga anggulo sang La Paz Police sa pagbuno sang suspetsado sa biktima.

Nag-surrender naman sa La Paz Police Station ang suspek subong nga kaagahon kag natalana kasuhan.