8 estudyante sang ICNHS, gin-alegar gin-possess sang espiritu sang pamilya nga nagapangayo hustisya sa ila napatay nga bata

By: Aine Grace Bravo | August 22, 2019

via Remember When

Iloilo City — Napuhag ang Iloilo City National High School sang nagwaras ang walo ka estudyante nga ginpahayag gin-possess sang espiritu.

Suno kay Ma. Theodora Puncion, clinic in-charge sa eskwelahan, alas-10 kaina sang aga sang may estudyante nga una nagwaras kag naglaton sa iban.

Gindala sa clinic ang mga estudyante nga kalabanan Grade 7, samtang ginkanselar ang mga klase kag ginpapuli ang iban nga mga estudyante.

Sang Martes, may estudyante suno kay Puncion nga gin-alegar gin-possess, kag nasulit kaina.

Suno naman sa amay sang isa sa mga estudyante, Martes sang naglain ang pamatyag sang iya bata pero naumpawan man antes nagbalik kaina.

Base sa panaysayon sang iya anak, may bata nga ginpatay sa puno sang sambag sa atubang sang classroom sang mga estudyante kag nagapangayo sang hustisya ang pamilya.

Indi naman maka-conclude si Father Mark Lester Senina sang Tanza Church kon gin-possess sang espiritu ang anum ka estudyante.

Nagpadulong sa eskwelahan si Father Senina sa eskwelahan kag ginbenditahan kag ginpangamuyuan ang mga estudyante kag ang puno sang sambag kag aparador sa diin gin-alegar naghalin ang mga espiritu.

Istoryahon pa sang pari ang mga estudyante kon ano ang natabu.

Mahimo man suno kay Father Senina nga may problema ukon wala nakakaun ang mga estudyante.