Ordinansa sa pagtukod kag pag-operate sang Megaworld Transport Hub, legal kag valid – Councilor Duron

By: Aine Grace Bravo | August 22, 2019

via Firingline

Iloilo City —  Valid final kag executory ang Ordinance No. 2019-110 nga naga-grant sang otoridad sa Megaworld Corporation sa pagtukod, pag-operate kag pagmentinar sang Transport Hub sa Iloilo Business Park.

Ini ang rekomendasyon ni Councilor Romel Duron, chairman sang Committee on Transportation sa City Council, kasunod sang iya ginhimo nga hearing sa reklamo sang New Iloilo Airport Transport Association kag Association of Taxi Operators in Panay sa pag-operate sang Megaworld Transport Hub kag P2P buses.

Paathag ni Duron, nagpangayo siya sang opinion sang City Legal Office bangud sa reklamo nga naga-conflikto sa Perimeter Boundary Ordinance ang Ordinance No. 2019-110 kag ang pag-operate sang P2P buses.

Base sa opinion sang CLO nga gin-adoptar sa committee report ni Duron, legal kag valid ang ordinansa.

Pwede suno kay Duron ang Konseho maka-amendar sang ordinansa nga gin-aprubahan sang una.

Ginpahayag naman sang CLO nga nalakip ang P2P buses sa category nga buses nga gin-enumerate sa bag-o nga ordinansa nga mahimo maka-operate halin sa Transport Hub.

Ginpa-athag ni Duron nga LTFRB ang nag-isyu sang franchise sa P2P buses, samtang ang syudad ang magaplastar sang ruta kon diin maagi ang P2P buses pakadto sa Transport Hub.