Ilonggo nga abogado, nagapati nga wala sang pulitika sa report nga posible mapalip-ut ang prison term ni convicted rapist, murderer former Mayor Antonio Sanchez

By: Aine Grace Bravo | August 23, 2019

via Aksyon Hotline

Iloilo City — Nagapati si Atty. Hans Sayno nga wala sang pulitika sa likod sang report nga mapalip-ot ang prison term ni convicted rapist kag murderer former Calauan, Laguna Mayor Antonio Sanchez nga preso sa New Bilibid Prison.

Abogado ni Sanchez sa kaso nga pagpatay kag paghimulos kay Mary Eileen Sarmenta kag pagpatay sa kapareho nga estudyante sang UP Los Baños nga si Allan Gomez sang 1993 si Atty. Salvador Panelo, nga presidential spokesman kag chief legal counsel subong ni Presidente Rodrigo Duterte.

Suno kay Sayno, may laye sa credits nga ginahatag sa mga na-convict agud mabuhinan ang inadlaw sang pagka-preso kag posible ini ang rason nga mapalip-ot ang prison term sang anay alkalde.

2013 pa ang amo nga laye suno kay Sayno.

Ginpa-athag ni Sayno nga mapunggan lang ang posible pagguwa ni Sanchez kon may pamatuod nga may nahimo siya nga indi maayo sa sulod sang prisuhan.

Sang 2006, ginkasuhan si Sanchez sang nakuha sa iya selda ang illegal drugs kag sang 2015, may nakuha nga airconditioning unit, flat screen tv kag transformer sa iya selda.