PCG, MARINA, naghiwat sang Institutional Support Mechanism Workshop

By: Aine Grace Bravo | August 23, 2019

via BBB

Iloilo City — Naghiwat sang Institutional Support Mechanism Workshop ang Philippine Coast Guard upod sa MARINA kahapon angut sa pag-phase out sang wooden-hulled motorbanca nga nagabiyahe sa Iloilo kag Guimaras.

Ginpresentar sang gin-imbitar nga boat builders kag ship builders ang desinyo sang mga motorbanca nga human sa steel, aluminum ukon fiber glass nga ibulos sa mga kahoy nga pump boats.

Gin-athag naman ni MARINA 6 Director Jose Venancio Vero nga wala pa sang timeline kon san-o i-implementar ang pag-modernize sang mga sakayan nga ipatuman man sa iban nga parte sang pungsod.

Sa presentasyon sang mga desinyo, ginabanta sa 4 tubtob 5 milyones pesos ang i-capital sang mga operators agud makapahimo sang isa ka motorbanca.

Naghingyo naman ang mga pump boat operators sa Jordan kag Buenavista nga hatagan sila sang tiun nga makatipon sang pondo para sa modernization.

Nagpresentar ang Development Bank of the Philippines nga may ara sila loan kag financing packages sa mga operators.

Samtang sa pamangkot ni Carles Mayor Siegfrid Betita kon ano ang himuon sa mga wooden-hulled pump boats, ginpahayag sang MARINA nga pwede gamiton ang mga sakayan para sa turismo pero indi dapat maglapaw sa 12 ang sakay.