Jail officer nga nakatiro-patay sa Barotac Viejo, irekomendar nga pasakaan sang kaso administratibo
By: JoMaque | August 24, 2019, 9:46am
Iloilo City — Irekomendar ni SJO3 Leo Laserna, chief sang Investigation and Prosecution Division sang Bureau of Jail Management and Penology 6, ang pagpasaka sang kaso administratibo batuk sa jail officer nga nakatiro-patay sa construction worker sa Barotac Viejo.
Suno kay Laserna, halos pinal na ang iya investigation report kag na-establisar nga mahimo pasakaan sang conduct unbecoming of a jail officer si JO1 Ryan Tupas.
Ginpasabat si Tupas ni Laserna, apang wala pa siya naghatag sang pahayag.
Natalana i-submit ni Laserna ang iya rekomendasyon sa BJMP central office.
Kun maaprubahan, pasakaan sang formal charge si Tupas kag mahimo masuspender samtang nagapadayon ang imbestigasyon.
Mahimo naman ma-dismiss si Tupas kun mapamatbatan nga guilty sa nasambit nga kaso administratibo.
Si Tupas ang suspect sa pagtiro-patay kay Ernesto Pescador Jr sa Barotac Viejo sang Agosto 14 sang gab-i.