Linibo, maapektuhan sa road widening project ni Sen. Franklin Drilon sa coastal barangays sang Molo, Arevalo; Senador, nag-athag wala pa sang budget ang proyekto

By: Aine Grace Bravo | August 24, 2019

via Aksyon Hotline

Iloilo City — Linibo ka naga-istar sa halin sa Barangay Bouevard, Molo pakadto sa Barangay Sto. Niño Norte, arevalo ang maapektuhan kon ma-implementar na ang road widening project nga ginaplano ni Senator Franklin Drilon.

Ang proyekto, isa sa tatlo ka priority projects nga nagabalor sang P1.2 billion nga gin-endorso sang City Council paagi sa ginpasar nga resolution sang nagligad nga semana.

Gin-athag naman sang senador nga ginatun-an pa subong sang Department of Public Works and Highways ang proyekto bangud wala sang relocation site sa maapektuhan nga mga pumuluyo.

Wala pa man sang final nga budget ang proyekto bangud wala pa sang complete study ang DPWH ilabe na sa kon diin i-relocate kag kun pila ang gastuhon sa pag-relocate.

Magluwas sa nasambit nga road widening/construction project, gina-propose man ang Railway Road halin Rizal tubtob Huervana, La Paz; kag ang Donato Pison Avenue halin Ateneo de Iloilo tubtob Tabucan Junction.