Mga operators sang Jordan Motorbanca Cooperative, nag-ako nga namahalan kun ilisan sang steel-hulled ang mga wooden-hulled nga sakayan

By: JoMaque | August 25, 2019, 8:32am

Iloilo City — Namahalan ang mga operators sang Jordan Motorbanca Cooperative sa paaghimoon nga modernization sa ila mga pumpboats.

Ini amu ang pag-phase out sang mga wooden-hulled nga sakayan kag ilisan sang steel-hulled.

Suno kay Ms. Marissa Ganancial, isa sa mga board of directors sang kooperatiba, indi makasarang maggasto ang mga operators agud magpahimo sang steel-hulled motorbanca.

Magluwas sini, indi man handa suno sa iya ang mga puerto sang Guimaras agud dungkaan sang mga steel-hulled nga sakayan.

Pero gin-athag ni Ganancial nga wala sila nagapamatok sa plano sang gobierno nga pagdula sang mga wooden-hulled nga motorbanca.

Sa pagkamatuod suno sa iya, nagapangita sang mautangan ang mga operators agud makapahimo sang steel-hulled nga sakayan.

Sang nagligad nga semana, ginsapol sang Philippine Coast Guard kag Maritime Industry Authority (MARINA) ang mga pumpboat owners and operators agud maistoryahan ang plano nga pag-modernize sang mga sakayan.

Kasunod man ini sang natabu nga trahedya sa Iloilo Strait sang Agosto 3 nga nagbilin sang 31 ka patay.