Bailey bridge sa Brgy. Talacuan, Leon, temporaryo nga ginsiraduhan bangud sa pag-usmod sang porsyon sang pundasyon

By: JoMaque | August 26, 2019, 9am

Leon — Temporaryo nga ginsiraduhan ang Bailey bridge sa Barangay Talacuan matapos nag-usmod ang pundasyon sini.

Suno kay Leon Mayor Lina Holipas, nadesisyunan upod sa Municipal Disaster Risk Reduction and Management Office, Municipal Engineer’s Office kag sang mga punong barangay sang Talacuan, Omambong , Biri Norte kag Biri Sur nga temporaryo nga siraduhan ang taytay bangud delikado sa mga nagalabay.

Mahimo mag-collapse ang nag-usmod nga duta nga ginabanta makapuno sang duha ka dump truck anuman nga oras.

Ang amo nga taytay (Bailey bridge) ang ginabanta 20 ka metros ang kalabaon kag may 12 metros nga kalaparon.

‘70 KA BARANGAY ANG APEKTADO’

Kapin 70 sa 85 ka mga barangay sa Leon ang apektado sa pagsirado sang taytay, suno sa alkalde, bangud nahamtang ang patyo sang banwa sa pihak nga porsyon sang taytay ( pakadto sa Biri Norte).

Dugang diri, ang amo nga taytay ang ginagamit naman sang mga pumuluyo sa Barangay Biri Norte, Biri Sur kag Omambong para makakadto sa Poblacion sang Leon.

Ma-install sang taytay nga human sa kawayan ang LGU sa lugar agud mahimo agyan sang mga pumuluyo.

Mahimo naman magamit sang mga motorista bilang alternative route ang barangay road sa Tina-an Sur.

Suno kay Talacuan Punong Barangay Romulo Cabana, mahimo man magamit sang mga pumuluyo sa Biri Norte, Biri Sur kag Omambong ang footwalk sa Barangay Barusong sa Tigbauan.