Kaso sang murder, rape kag robbery sa syudad, nagdamo ipaanggid sang 2018 – ICPO

By: JoMaque | August 29, 2019, 9:13am

Iloilo City — Mas nagdamo ang na-record nga kaso sang murder, rape kag robbery sa syudad halin Enero tubtob Hulyo subong nga tuig ipaanggid sang 2018 sa amo nga period.

Base sa data sang Iloilo City Police Office, pinakamadamo ang pagtaas sang robbery nga naglab-ot sa 47 ipaanggid sang 2018 nga 31 lang.

Halin sa 19, nagtimbuok naman sa 27 ukon nagtaas sang walo ang na-record nga kaso sang rape.

Sa murder, nagsaka sa 14 ang na-record nga mga kaso ipaanggid sang 2018 nga 12 lang.

LAKIP ANG ‘GINRIDING-IN-TANDEM’

Lakip sang mga nabiktima sa na-record nga murder cases ang may kaangtanan sa illegal nga druga suno kay PCPT Shella Mae Sangrines, Spokesperson sang ICPO.

Dugang niya, kalabanan man sa mga suspetsado ang riding-in-tandem nga wala pa makilala.

Subong nga Agosto, gintiro-patay sa magkatuhay nga lugar sang riding-in-tandem kanday Robert Isubal kag Mark Muller.

Sang Hulyo, gintiro-patay si Ernesto Regalado Jr sa Alalasan, Lapuz sang riding-in-tandem.

Lunsay wala pa nakilala ang mga suspetsado.

‘MAJORITY GINASALIGAN SANG TAGREKLAMO’

Kalabanan sa mga ginareklamo sang paglugos ang himata ukon kilala sang tagreklamo suno kay Sangrines.

May mga kahigayunan man nga abyan ang ginareklamo kag naka-inom sila antes nagluntad ang insidente.

Naga-conduct sang lectures sa komunidad kag eskwelahan ang mga pulis kag mga advocacy groups agud mapahanumdum ilabi sa mga kabataan ang mga risgo kag malikawan nga ma-angut sa mga insidente.

Kalabanan sa mga robbery cases ang nagluntad sa dis-oras sang gab-i suno kay Sangrines.

Dapat mangin ‘security conscious’ agud malikawan nga mabiktima suno kay Sangrines.