(UPDATE) Resto bar sa Smallville sa diin naggabot kag nagkasa sang pusil ang customer nga jail officer, ginapa-imbestigaran sa PSTMO kon naglapas sa EO 46

By: Aine Grace Bravo | August 29, 2019

via Aksyon Jeremae Ventar/Aljohn Torreta

Iloilo City — Ginapa-imbestigaran sang Business Permits and Licensing Office (BPLO) sa Public Safety and Transportation Management Office (PSTMO) kon naglapas ang Saxxy’s Bar and Grill sa Smallville Complex, Mandurriao sa mga guidelines sang Executive Order 46.

Kasunod ini sang reklamo batuk sa customer nga jail guard nga nagabot kag nagkasa sang pusil kaina sang kaagahon. Ginpahayag sang mga kaupod ni Jail Officer 2 Iris Lizada nga wala sila ginkapkapan sang nagsulod sa establisemento.

Suno kay PSTMO Head Jeck Conlu, na-subject na sa inspection ang Saxxy’s sang nagligad nga semana kag compliant man sila sa EO. Posible suno sa iya nga wala nasustiner sang establisemento ang body frisking guideline sa mga nagasulod.

‘MOTU PROPIO INVESTIGATION’

Imbestigaran naman sang Bureau of Jail Management and Penology 6 batuk si Lizada.

Ginkumpirmar ni Senior Jail Officer 3 Leo Laserna, chief sang Investigation and Prosecution Division sang BJMP 6, nga pangayuan niya sang statement si Lizada.

Ginsulit ni Laserna nga ginadumilian ang BJMP personnel sa pagdala sang issued firearm sa mga lugar nga indi sakup sang ila esponsibilidad kag ginadumilian man sila mag-inom sa pampubliko nga lugar.