DILG, nagabulig sa mga badac agud mangin ‘compliant’ sa kampanya kontra illegal nga druga; Mga local officials nga napaslawan sa ila mga respondibilidad, mahimo naman pasakaan kaso sang mga interesado

Read Time:1 Minute, 34 Second

By: JoMaque | August 31, 2019, 9:30am

Iloilo City — Ginabuligan sang Department of the Interior and Local Government ang mga Barangay Anti Drug Abuse Council (BADAC) agud mangin compliant sa kampanya kontra illegal nga druga.

Suno kay DILG 6 Monitoring and Evaluation Division Head Maricel Bechayda, gina-monitor nila ang functionality sang mga BADAC agud mahibaluan kon epektibu.

Ginatawag naman ang atensyon sang mga mapaslawan sa pag-obligar sa ila mga responsibilidad, sandig sa Joint Memorandum Circular sang DILG kag Dangerous Drugs Board 2018-01, agud maka-comply sila tubtob nga madeklarar nga drug cleared ang ila barangay.

Base sa data sang DILG 6 as of April 22, 2019, 100% na nga functional ang 4,050 ka mga barangay sa Western Visayas, 5% sa amo nga numero ang low compliant, 64% ang moderately compliant samtang 31% ang highly compliant base sa key indicators nga gindihon sang DILG kag DDB.

‘WE ARE ONLY TASKED TO MONITOR, TRAIN THEM’

Nanindugan si Bechayda nga nasentro ang ila papel sa pag-monitor sa performance sang BADAC.

Dugang diri, naga-conduct man sila sang seminar sa mga barangay officials agud magiyahan sila sa ila mga responsibilidad.

Naga-submit naman sang report ang regional office sa central office nga amo ang naga-issue sang mga pagsulundan.

Sandig sa Joint Memorandum Circular 2018-01 sang DILG kag DDB, mahimo pasakaan kaso administratibo ang mga local officials nga naglapas sa anuman nga probisyon sang amo nga memo.

Suno kay Bechayda, wala natul-id sa memorandum kun sin-o ang mapasaka sang kaso, apang mahimo ini obrahun sang sin-o man nga interesado.

‘IMPORTANTE ANG PAPEL SANG BADAC’

Una na ginpahayag ni DDB Secretary Catalino Cuy nga dako ang papel sang BADAC sa pagpapas sang illegal nga druga.

Kalabanan sang mga drug transaction ang ginapatihan nagakatabo sa mga barangay.

Dugang niya, magluwas sa pagtukod sang BADAC, importante man ang pagmentinar sang functionality sini.