ArchivesLokal

Grupo sang mga pamatan-on, nagbalik lihu-lihu, nagatipon kag nagahimo sang initiation rites suno sa TF on Moral and Values Formation

By: Aine Grace Bravo | August 31, 2019

via Hotline

Iloilo City — May nagbalik nga grupo sang mga pamatan-on nga nagalihu-liho sa syudad, nagatipon kag nagahimo sang initiation rite sa dis oras sang gab-i.

Ini ang ginbuyagyag ni Task Force on Moral and Values Formation Head Nestor Canong matapos nadakpan ang 20 ka menor-de-edad nga lalaki sa Brgy. Rizal Pala-Pala II, City Proper pasado las 10 kagab-i.

Suno kay Canong, bisan nareporma na ang daan nga mga gangs paagi sa Project B.O.N.G (Bringing Order to the Nemesis of Gang, may yara naman nga nagtuhaw.

Gintumod ni Canong ang SPERM Jr nga amu ang nagatipon kag magahimo kuntani sang initiation rite sa ila mga bag-o nga miembro sa nasambit nga barangay kagab-i base sa impormasyon nga nabaton sang task force.

May mga spotter nga ginbutang ang task force sa lugar matapos ginplanuhan sang nagligad nga semana ang pagdakup sa akto sa aktibidad sang grupo.

Base man sa impormasyon nga nabaton ni Canong, madugay na nga nagahimo sang initiation rite ang SPERM Jr sa mga barangay nakapalibot sa Iloilo Terminal Market.

KABISADO ANG LUGAR

Indi basta-basta madakpan sa akto ang ginahimo nga initiation rite sang grupo nga SPERM Jr bangud kabisado nila ang walo ka entrance kag exits sang Iloilo Terminal Market.

Ini ang rason suno kay Canong nga ginplanuhan nila ang ila operation tubtub nga na-rescue ang 20 ka menor de edad nga lalaki sa Rizal Pala-Pala 2, City Proper kagab-i.

Suno kay Canong, kon mahibaluan sang mga miembro sang grupo nga may makadtu sa ila, madasig sila nga nagapalagyo sa mga malapit nga barangay.

Upod sang task force sa pag-rescue sa mga menor-de-edad ang mga barangay officials kag taga-Women and Children Protection Desk (WCPD) sang Iloilo City Police Office (ICPO).

‘JUMP IN OR FREE FOR ALL’ INITIATION

Sa operation kagab-i, ginpahayag ni Canong nga may nakuha nga video footage ang ila asset sa initiation rite para sa mga bag-o nga miembro sang grupo.

Makita sa video suno sa iya ang ‘jump in’ ukon ‘free for all’ nga sahi sang pagkastigo sang mga ginatawag nga ‘masters’ sa ila mga bag-o nga miembro.

May posibilidad suno kay Canong nga malala ang madangatan sang bag-o nga miembro kon indi siya maka-survive sa pagsapote sa iya.