P20 terminal fee sa terminal building sa Fort San Pedro, ginsuspender

By: Aine Grace Bravo | August 31, 2019

via Firingline

Guimaras — Indi madayon ang pagpanukot sang Philippine Ports Authority (PPA) sang P20 terminal fee para sa ila passenger terminal building sa Fort San Pedro nga maga-epekto kuntani buwas, Setyembre 1.

Ginkumpirmar ni Guimaras Vice Governor John Edward Gando nga naghalin ang impormasyon kay Guimaras Representative Ma. Lucille L. Nava matapos ang iya pagpakig-istorya kay PPA General Manager Jay Santiago.

Una na nga nagwangal ang mga Guimarasnon bangud dugang nga palas-anon sa ila ang terminal fee kon madayon.

Sa puerto sa Fort San Pedro nagadungka ang mga fast crafts sang MV Yohan nga amo lang ang ginapasugtan sang Coast Guard nga magbiyahe sa Iloilo-Guimaras sea route kon gab-i kag malain ang tiyempo.

‘SUSPENDED’

Ginkumpirmar ni Engr. Antonio Belarga, OIC sang PPA Iloilo, nga may mandu halin sa ila central office nga ipa-iway ang pagpatuman sang terminal fee.

Una na ginpa-athag ni Belarga nga 2006 pa ginpaagi sa public hearing ang tikang. Nagapanukot man suno sa iya ang PPA sang terminal fee sa Iloilo Fastcraft Terminal.