STL Guimaras, balik operasyon sugod sa Setyembre 1

By: JoMaque | September 1, 2019, 8:34am

Guimaras – May go signal na halin sa Philippine Charity Sweepstakes Office (PCSO) ang pagbalik sang STL Guimaras operation.

Suno kay Mr. Arnel Asturias, incorporator sa Iloilo Small Town Lottery Gaming Corporation nga STL operator sa Guimaras, may communication na halin kay PCSO General Manager Royina Garma nga nagapahibalo nga pwede na makabalik operasyon ang STL sa Guimaras sugod sa Setyembre 1.

Ini matapos nga na-comply sang Iloilo Small Town Lottery Gaming Corporation ang mga kondisyon lakip ang pagbayad sang cash bond nga equivalent sa tatlo ka bulan nga presumptive monthly retail receipt (PMRR). Masobra P6 million ang PMRR sang STL operator sa Guimaras suno kay Asturias.

Gilayon nag-coordinate ang operator kay Police Regional Office (PRO) 6 Director PBGEN Rene Pamuspusan, Guimaras Police Provincial Office (GPPO) Director PCOL Hector Maestral kag mga hepe sang municipal police stations sang Guimaras angut sa pag-resume sang operasyon.

Nagpakig-angut man ang operator kay PCSO Iloilo Branch Manager Jeanette Lloyd nga nag-confirm nga may deployment na sila para sa Guimaras.

Ang Iloilo Small Town Lottery Gaming Corporation suno kay Mr. Asturias, nalakip sa mga STL operators sa pungsod nga may ‘good standing’ bangud wala sila sang violations kag nagabayad sila sa ensakto nga oras.

Alas-2 sa hapon kag alas-8 sa gab-i gihapon ang draw sang STL Guimaras.