Ginpatay nga ‘bagman’ sang Berya Drug Group sa Bacolod City, posible nga nagpadayon sang involvement sa illegal drugs — Bacolod City Police Office
By: JoMaque | September 2, 2019, 8:30am
Interview with BCPO Director Police Colonel Henry Biñas
Iloilo City — Indi pa matumod sang Bacolod City Police Office kon may kaangtanan sa illegal nga druga ang pagtiro-patay kay self-confessed drug personality Ricky Serenio sa dalan Araneta, Pahanocoy, Bacolod City sang Agosto 31.
Suno kay Police Colonel Henry Biñas, director sang Bacolod City Police Office, nagapadayon pa ang ila imbestigasyon sa krimen bisan pa nga nag-ako sadtu si Serenio nga may koneksyon siya sa police-identified Berya Drug Group.
Ginpahayag ni Biñas nga imbestigaran man nila ang nadakpan nga duha ka persons of interest nga sanday Jomar Dumip-ig sang Barangay 14, Bacolod City kag Alan Bustamante sang Mabuhay Dos, Negros Occidental.
Naka-hospital arrest ang mga suspek matapos napilasan sang nagresponder ang mga pulis.
Wala naman sang ideya si Biñas kon ngaa yara sa nasambit nga barangay si Serenio.
Nagamaneho sang awto si Serenio upod ang iya abyan sang ginpalapitan sang tatlo ka suspetsado nga nakasakay sa motorsiklo kag gintiro sang anum ka beses.
Enero 2017 sang naaresto si Serenio matapos ginserbihan sang warrant of arrest sa kaso nga grave coercion.
Sa interview sadtu sang Aksyon Radyo Iloilo kay Serenio, gin-ako niya nga nangin police asset siya antes siya nag-upod sa Berya Drug Group.
RECOVERIES
Lima ka pocket-sized notebooks kag tatlo ka regular-sized notebooks ang narecover sa sulod sang salakyan ni Serenio.
Nabutang sa mga notebooks ang mga ngalan ukon code names kag mga kantidad.
Wala sang may narecover nga illegal drugs kag kuwarta sa sulod sang salakyan.
Pero may narecover man nga anum ka bank books. Isa dire ang nakapangalan kay Serenio.
Base sa impormasyon, may ginatineran nga boarding house sa Pahanocoy, Bacolod City si Serenio.
Sang nadakpan si Serenio sang Enero 8, 2017, iya gin-ako nga duha ka tuig siya nga nangin police asset antes nag-upod sa police-identified beria drug group kag nangin finance officer sang Berya Drug Group.
Sa iya nga affidavit, ginsugid ni Serenio nga trabaho niya ang pagpanghatag sang payola sa mga police nga gin-identify sang drug group leader nga si Berya Tolentino.
Magluwas sa mga police, ginbuyagyag man ni Serenio nga nagahatag man siya sang payola sa mga judges, court employees, taga-PDEA kag NBI kag katapo sang media.
Ginbuyagyag man ni Serenio sa iya affidavit nga mga drug protectors sanday Senator Franklin Drilon, former Senator Manuel “Mar” Roxas II kag former Iloilo City Mayor Jed Patrick Mabilog.