Hinablos, ginbuno-patay sang iya tiyo sa Arevalo

By: JoMaque | Setyembre 2, 2019, 8:30am

Arevalo, Iloilo City — Patay ang hinablos sang nabun-an sang iya tiyo sa Zone 12, Calaparan, Arevalo kagab-i, Setyembre 1.

Ginkilala ang biktima kay Wilfredo Abantao Jr., 39, nga may pilas sa siko kag tiyan. Gindala sa ospital ang biktima pero wala natabangan.

Suno kay Police Lieutenant Benjie Ballejera, hepe sang Arevalo Police Station, suspek sa krimen ang tiyo sang biktima nga si Salvador Abantao, 55, nga residente man sang amo nga lugar.

Nakainom suno kay Ballejera ang suspek kag nagamaoy sang ginsaway sang biktima.

Posible nga ginkaakig sang suspek ang pagsaway sa iya rason nga ginbuno ang hinablos.

Na-recover naman sa crime scene ang kutsilyo nga gingamit sa krimen.

Preso sa Arevalo Police Station ang suspek.