Police, may person of interest na sa nagpatay sa 68-anyos nga lalaki kag nagsulod sa biktima sa saku sa Guimaras
Guimaras (UPDATE) – May person of interest na ang Jordan police sa nagpatay kay Andres Jenon, 68 anyos sang Sitio Balading, Brgy. San Miguel, Jordan, Guimaras.
Nasapwan ang bangkay ni Jenon nga nasulod sa saku kag natampukan sang mga bato sang Sabado sang aga.
Base sa CCTV footage nga nakuha sang police, nakit-an pa si Jenon sang Agosto 20 nga nagapangayo-kayo sa Divisoria Store sa Jordan.
Suno kay Nonong Galotera, hinablos sang biktima, natingala sila nga wala na nakapauli si Jenon kag sirado gihapon ang kamalig nga ginabilinan ni Jenon sang iya mga bayo rason nga nag-report sila sa police sang Agosto 26.
Sang Agosto 31, nagdesisyon sila nga pangitaun ang biktima tubtob nga natukiban ang iya bangkay nga nasulod sa saku. Wala pa makita ang sling bag nga masami dala sang biktima.
Ginpahayag naman ni alyas Nene nga may nabatian siya nga tingog nga naga-anggid sa biktima kag nagapangayo sang bulig sang Agosto 21 sang kaagahon malapit sa kamalig nga gina-istaran ni Jenon.
Ginpahayag ni PMAJ Rey Teñala, hepe sang Jordan MPS, nga ginakuha na lang nila ang statement sang testigo. Nag-ayo si Teñala nga indi anay paghingadlan ang person of interest.