Lisensya sang driver sang sports car nga nakabunggo patay sa mag-asawa nga principal kag maestra sa Diversion Road sang Hunyo, gin-revoke sang LTO

By: Aine Grace Bravo | September 4, 2019

via Aljohn Torreta

Iloilo City — Gin-revoke sang Land Transportation Office (LTO) 6 ang lisensya sang driver sang sports car nga nakabunggo-patay sa mag-asawa nga principal kag manunudlo sa Diversion Road, Mandurriao sang Hunyo.

Base sa resolution nga ginpirmahan ni LTO 6 Director Roland Ramos, indi nagaka-angay nga magmaneho sang salakyan si June Paul Valencia bangud klaro sa CCTV footage nga madasig ang pagmaneho niya sang sports car sang nabungguan kanday Alnie Dinah kag Joemarie Osano nga nagatabok sa pedestrian lane.

Nakabutang sa Section 42 Paragraph C sang Land Transportation and Traffic Code nga kinahanglan i-obserbar sang driver ang right of way sang pedestrian nga nagatabok sa highway sa business ukon residential district.

Wala naman nakasumiter sang pahayag si Valencia sa LTO6 sa pihak sang ginhatag sa iya nga tyempo kag konsiderasyon agud makapa-athag.

Una na nga gin-suspend sang LTO 6 ang driver’s license ni Valencia sang 90 ka adlaw kasunod sang insidente.

Nagapadayon naman ang reckless driving resulting to double homicide batuk kay Valencia nga ginpasaka sang mga himata sang mga napatay.