Hazing kag ginpahayag paghimo sex den sa Iloilo Terminal Market, nag-untat na — LEEO

By: JoMaque | September 7, 2019, 8:17am

Iloilo City— Nauntat na ang mga ilegal nga aktibidad sa Iloilo Terminal Market pareho sang hazing sang mga menor-de-edad sa mga luyag magsulod sa grupo kag ang gina-alegar paghimo nga ‘sex den’ sa second floor sang merkado.

Ginpabutyag ini ni Local Economic Enterprise Office (LEEO) head Ariel Castañeda kasunod sang ila ginhimo nga operasyon sang nagligad nga semana.

Naabtan sa akto sa ila operasyon ang mga menor-de-edad sa sulod sang merkado sa diin na rescue ang indi magnubo sa 10 ka mga menor nga mahimo kuntani sang hazing.

Ginhimo ang operasyon matapos nakabaton sang impormasyon ang LEEO nga may nagakatabo nga kasubong nga mga aktibidad sa merkado. Gilayon sila nag-coordinate sa mga pulis kag Task Force on Moral and Values Formation.

Nakakas naman suno kay Castañeda ang mga trapal nga ginhimo kuwarto-kwarto sa second floor sang merkado nga ginpahayag ginaparentahan sang mga bugaw.

Plano subong sang LEEO nga pabutangan sang mga CCTV cameras ang sulod sang merkado kag roving patrol agud ma-monitor kun may mga iligal nga aktibidad nga nagakatabo.

Nag-coordinate naman sila sa mga barangay officials sa palibot sang merkado agud mapahanumdom sa mga ginikanan nga bantayan gid ang ila kabataan.