OCD 6, manguna sa simulation exercise kon may magkulob nga pump boat sa Iloilo Strait

By: Aine Grace Bravo | September 7, 2019

via Aksyon KhenJo Terco

Iloilo City — May himuon nga simulation exercise sa Iloilo Strait sa Setyembre 12 sa pagpanguna sang Office of the Civil Defense (OCD) 6.

Katuyuan sini nga matakos ang abilidad sang mga rescuers sa pag-responde sa nagkulob nga sakayan kag para mahibaluan pa ang mga dapat i-improve agud indi na masulit ang natabo nga trahedya sa Iloilo Strait sang Agosto 3 nga nagbilin sang 31 ka patay.

Sa himuon nga aktibidad, may actual gid nga pump boat nga pakulbon suno kay OCD 6 Director Jose Roberto Nuñez.

Pasakupan ang exercise sang Philippine Coast Guard, Philippine Army, Philippine National Police, kag iban pa nga mga rescuers.

Gina-imbitar man ni Nuñez ang publiko nga magtambong agud maghatag sang komento sa mga dugang pa nga dapat buhaton.

Samtang magahatag naman ang OCD 6 sang financial assistance nga tag-P20,000 sa mga benepisyaryo sang mga nagkalamatay sa trahedya sang Agosto 3.