(UPDATE) Sara, Iloilo SB Secretary James Balsomo I alyas Jaguar nga natiruhan sa buy bust operation, nagbulos nga drug group leader sa Quinto Distrito suno sa PDEU

By: Aine Grace Bravo | September 7, 2019

via Hotline

Iloilo — Ginatudlo nga drug group leader sa Kinto Distrito si Sara Sangguniang Bayan Secretary James Balsomo I alyas Jaguar.

Suno kay Provincial Drug Enforcement Unit (PDEU) Head Police Major Jonathan Pinuela, si Balsomo ang nagbulos sang nadula ang Balume kag Bandas Drug Groups.

Sang napatay suno sa iya si PDEA-identified drug group leader Melvin Odicta, sa Negros Occidental nagakuha sang supply sang illegal nga druga si Balsomo.

Ang mga downline sang Balsomo Drug Group ang nagkaladakpan man sadtu suno kay Pinuela.

Ginpanindugan ni Pinuela nga nagbatu si Balsomo sang gin-conduct ang drug buy bust operation sa atubang sang munisipyo sang banwa pasado las 12 kahapon sang hapon, Setyembre 6.

Na-consummate suno sa iya ang transaksyon kag namutikan ni Balsomo nga pulis ang nag-transaksyon sa iya.

Ginpahayag ni Police Major Pinuela nga tinuig ang ila pag-monitor sa aktibidad ni Balsomo.

Padayon nga ginabulong sa ospital sa syudad si Balsomo bangud sang pilas sa tunga-tunga sang dughan, ibabaw sang wala nga porsyon sang dughan kag wala nga abaga.

Nagapati naman ang pamilya nga wala sang buy bust nga natabu. Suno sa miyembro sang pamilya nga na-interview sang Aksyon Radyo News Team, naguwa sa munisipyo si Balsomo agud manyaga sang gintiro siya samtang pasakay sa iya salakyan.