Newly-identified drug personality, dakup sa buy bust operation sa Mandurriao

By: JoMaque | September 8, 2019, 8:15am

Iloilo City— Dakop sa drug buy bust operation ang 39 anyos nga lalaki sa Bakhaw, Mandurriao las 10:30 kahapon sang aga, Setyembre 7.

Ginkilala ang subject kay Sydney Pornel sang amo man nga barangay.

Gin-conduct ang operasyon sang Station Drug Enforcement Team sang Mandurriao Police Station sa pagpanguna ni Police Major Marlon Valencia, hepe sang Mandurriao Police Station.

Suno kay Staff Sergeant Philip Espejo sang Mandurriao Police Station, mga isa ka semana nga gin-monitor sang kapulisan ang subject. Natabo ang transaksyon sa sulod sang salakyan sang poseur buyer.

Nabaklan ang subject sang isa ka sachet sang suspected shabu nga nagabalor P1,500. Nakuha man sa iya ang lima pa ka mga sachets sang suspected illegal drugs.

Ginpahayag ni Espejo nga sa Bacolod pa nagakuha sang supply si Pornel kag mga kakilala niya man ang iya mga parokyano.

Samtang ginpanginwala naman subject nga may natabo nga buy bust.

Suno sa iya, indi matuod nga sa Bakhaw siya gindakop.

Ginpabutyag ni Pornel nga ginhagad siya sang iya live-in partner sa Cabatuan agud kuhaon ang bata sang iya ka-live in kag idul-ong sa eskwelahan.

Pero samtang yara sa sulod sang ila balay sa Cabatuan, may nag-abot suno sa iya nga mga pulis kag gulpi na lang siya gindakop.

Ginsabat naman sang mga pulis nga alegasyon lang ini sang subject.