Co-accused sa pagpatay kay Ilongga OFW Joanna Demafelis, guilty sa murder suno sa Syrian District Criminal Court

By: Aine Grace Bravo | September 9, 2019

via: PNA

Napamatud-an sang Syrian District Criminal Court nga guilty sa murder ang co-accused sa pagpatay kay Ilongga OFW Joanna Demafelis nga tumandok sang Sara, Iloilo.

Ginkumpirmar sang Department of Foreign Affairs (DFA) sa ila ginpaguwa nga statement nga “The DFA-Office of the Undersecretary for Migrant Workers’ Affairs reports that the Syrian District Criminal Court found Mouna Ali Hassoun, accused in the Joana Demafelis case, guilty of murder.”

Nagpasalig ang DFA nga padayon sila nga magahatag sang legal assistance sa pamilya Demafelis tubtob nga malab-ut nila ang hustisya.

Magluwas kay Hassoun, ginkasuhan man sang murder ang iya bana nga si Nader Essam Assaf sa Lebanon.

Nasapwan si Demafelis sa freezer sa abandonado nga apartment sang mga akusado sa Al-Shaab, Kuwait sang nagligad nga tuig.

Base sa autopsy, ginkastigo kag gin-torture si Demafelis, kag patay na siya antes ginsulod sa freezer.

Sang natukiban ang bangkay sang OFW, nag-ibwal ang kaakig sang pungsod nga nagresulta sa deployment ban sang bag-o nga mga Filipino workers sa Kuwait.

Wala pa sang dugang nga detalye ang DFA angut sa desisyon sang Syrian Court.