ArchivesLokalUncategorized

Senior citizen nga convict kag nakaguwa matapos nag-avail sang GCTA, nag-surrender sa pulis sa Dingle

By: JoMaque | September 9, 2019, 9am

Iloilo — Nag-surrender sa Dingle Police Station ang 60-anyos nga convict nga tumandok sang Antique nga nakaguwa sa karsel matapos nag-avail sang Good Conduct Time Allowance.

Suno kay Lt. Col. Dennis Alcarde, Commanding Officer sang PAF Tactical Operations 6, nagpalapit sa ila opisina sa Dingle si alyas Kent para buligan siya sa pag-surrender.

Tumandok si Kent sang Antique kag sang Agosto 23 lang siya nakaguwa sa Sablayan Prison and Penal Farm sa Occidental Mindoro pagkaligad sang 29 ka tuig nga pagkapreso angut sa kaso nga murder.

Nag-surrender si Kent matapos nabatian ang mandu ni Presidente Rodrigo Duterte angut sa kontrobersiya sa paghatag sang GCTA.

Suno kay Iloilo Police Provincial Office Director Roland Vilela, gin-record sang pulis ang pag-surrender ni Kent kag ginpaidalum sa medical examination apang hilway siya nga nakapauli.

Nagpasalig naman si Kent nga makooperar sa pulis.

Una na nga gin-report nga nag-surrender man sa Culasi Police Station ang 57-anyos nga convict nga nakaguwa sa Iwahig Prison and Penal Farm sa Palawan sang Agosto 6 matapos nag-avail sang GCTA.

Lunsay sa idalum sang pagdumala sang Bureau of Corrections ang Iwahig Prison and Penal Farm kag Sablayan Prison and Penal Farm.

Leave a Reply