149 ex-convicts sang heinous crime sa Western Visayas nga nag-avail sang GCTA, i-subject sa ‘tokhang’ sang mga pulis
By: JoMaque | September 12, 2019, 8:34am
Iloilo City — Tuktukon kag hingyuon ukon ‘tokhangun’ sang mga pulis ang 149 ex-convicts sang heinous crime sa Western Visayas nga naka-avail sang Good Conduct Time Allowance agud mag-surrender sa mga pulis.
Suno kay Lieutenant Colonel Joem Malong, Spokesperson sang Police Regional Office 6, nagmandu si PNP Chief PGEN Oscar Albayalde nga kinahanglan i-assist sang mga pulis ang pag-surrender sang mga natungdan para ma-account sa Bureau of Corrections .
I-subject naman sila sa police operation kun mapaslawan nga mag-surrender sa gintalana nga tyempo.
Nagmandu si Presidente Rodrigo Duterte nga kinahanglan mag-surrender sang mga ex-convicts sang heinous crime nga naka-avail sang GCTA kasunod sang kontrobersiya sa BuCor.
Nakuha sang PRO 6 ang ila listahan halin sa Bureau of Corrections.
‘KAPIN 50% TAGA NEGROS OCCIDENTAL’
Sa 149 ka mga ex-convicts sang heinous crime sa Western Visayas nga naka-avail sang GCTA halin 2013, kapin 50% ang tumandok sa Negros Occidental.
Base sa data, 78 tanan ang mga ex-convicts sang heinous crime sa Negros Occidental, 21 sa amo nga numero ang taga-Bacolod City.
Ginsundan naman ini sang Iloilo Province, 29; Aklan, 15 ; Capiz, 13 ; kag Iloilo City kag Antique nga may tag-pito ka mga ex-convicts sang heinous crime nga nag-avail san GCTA.
‘SIN-O LANG DAPAT ANG MA-SURRENDER?’
Gin-anunsyar ni Duterte sa ginpatawag niya nga press con sang Setyembre 4 nga kinahanglan mag-surrender sang 1,700 ka mga ex-convicts para sa re-computation sang ila GCTA.
Base naman sa data sang BuCor, naglab-ot sa 1,914 ang mga ex-convicts sang heinous crime nga nag-avail sang GCTA halin sang 2016 tubtob subong nga tuig.
445 ang mga ex-convicts sang heinous crime halin 2014 tubtob sa second quarter sang 2016.
Lakip sa mga ngalan nga ginpadala sang BuCor sa PRO 6 ang mga ex-convict sugod sang 2013.
Sa rehiyon, 13 na ang nag-surrender nga mga ex-convticts (as of 6:00 P.M. sang Setyembre 10); walo sa Iloilo Province, tag-duha sa Aklan kag Negros Occidental kag Antique nga may ex-convict man nga nag-avail sang GCTA.