Mga badjao nga ginpang-rescue, ginbalik sang city government sa ila mga ginikanan matapos sila ginhatagan sang lecture

By: JoMaque | September 14, 2019, 9:32am

Iloilo City— Gin-release kag ginbalik sa ila mga ginikanan ang nga Badjao nga ginpang-rescue sang City Government sang Martes, Setyembre 10.

Suno kay Executive Assistant to the Mayor Hector Alijano, pagkatapos nga ginhatagan sang lecture kag ginpakaon ang mga Badjao, ginpa-athagan sang CSWDO ang ila mga ginikanan kag ginpahibalo sang ila mangin salabton kun liwat nga makit-an ang ila kabataan nga nagapangayo-kayo sa dalanon.

42 ka mga Badjao ang na-rescue sang CSDWO, upod ang PSTMO, PNP, kag NBI kag ginpatiner sa covered court sang Sambag, Jaro.

May gin-deploy nga mga police auxiliary sa pila ka mga areas sa siyudad suno kay Alijano agud magbantay kun may mga Badjao pa nga magliho-liho.

I-rescue liwat ang makit-an nga mga Badjao kag posible magpangatubang sang nagakaigo nga disciplinary action ang ila mga ginikanan.

Pati ang mga traffic aides pwede nga maka-rescue sa makit-an nga Badjao dugang pa ni Alijano.

Indi man pwede nga patineron sang madugay sa isa ka lugar ang mga Badjao bangud magastohan ang siyudad sa pagpakaon sa ila.

Ginpahayag man ni Alijano nga aprobado na ang request sa Office of the Civil Defense (OCD) 6 nga pasakyon sa military plane ang mga Badjao kag idul-ong sa ila place of origin. Ginahulat na lang ang eroplano nga pasakyan sa ila.

Liwat nagpangabay si Alijano sa publiko nga indi paghatagan ang mga nagapangyo-kayo nga mga Badjao para nga indi na sila magsagad pa ka pangayo. Ginapahibalo suno sa iya sang mga Badjao nga ari diri sa Iloilo ang ila mga himata sa ila ginhalinan nga maalwan maghatag ang mga Ilonggo rason nga nagadamo pagid ang mga Badjao sa siyudad.