ArchivesLokal

Dengue cases sa Western Visayas, padayon nga naganubo

By: Aine Grace Bravo | September 16, 2019

via KhenJo Terco

Iloilo City — Padayon nga naganubo ang kaso sang dengue sa Western Visayas base sa record sang Department of Health 6.

Halin Enero 1 tubtob Setyembre 7 subong nga tuig, naka-record ang DOH sang 1,102 ka panibag-o nga kaso. Manubo ini kun ikumparar sa katapusan nga record nga 1,514 ka kaso.

Sa kabug-usan, may 46,681 ka kaso sang dengue sa rehiyon.

Nagapanguna ang probinsya sang Iloilo nga may pinakamadamo nga kaso nga naglab-ot sa 19,005; nagapangaduha ang Negros Occidental nga may 7,963 kag pangatlo ang Capiz nga may 5,715 ka kaso.

Naglab-ot naman sa 204 ang napatay Western Visayas bangud sa dengue,  pinakamadamo ang halin sa probinsya sang Iloilo nga may 70, ginasundan sang Negros Occidental nga may 52 kag Capiz nga may 23.

Nagapanawagan gihapon ang DOH sang kooperasyon sang publiko nga magpadayon sa pagpanglimpiyo sang palibot agud maguba ang posible pangitlogan sang mga lamok.

Wala pa gindula ang dengue outbreak sa Western Visayas.