Mga ex-convicts nga nag-surrender sa mga police stations sa rehiyon, ginapadala ni PRO 6 Director Rene Pamuspusan sa BJMP facility

By: Aine Grace Bravo | September 17, 2019

via Aljohn Torreta

Iloilo — Ginmanduan ni Police Regional Office 6 Director PBGEN Rene Pamuspusan ang mga chiefs of police nga dal-on sa facility sang Bureau of Jail Management and Penology 6 ang mga ex-convicts nga naka-avail sang time allowances nga una na nag-surrender sa ila apang ginpapuli.

Suno kay PLTCOL Colonel Joem Malong, Spokesperson sang PRO 6, ma-issue sang memorandum si Pamuspusan kasunod man sang iya sinapol upod kanday BJMP 6 Director Arnel Gongona kag PRO 6 Deputy Regional Director for Operations PCOL Harold Tuzon sang Sabado.

Sang Setyembre 12 pa nag-issue sang memorandum ang BJMP Central Office natuhoy sa pag-detain sa mga nag-surrender nga ex-convicts sa ila facility.

Kasunod sang mandu ni Pamuspusan, i-contact sang mga pulis ang mga ex-convicts nga una na nag-surrender sa ila.

May layabilidad ang mga hepe kun indi madala sa BJMP 6 facility ang mga ex-convicts nga nag-surrender.

Wala sang specific nga petsa nga ginhatag ang PRO 6 kun san-o dapat dal-on sa BJMP 6 facility ang mga ex-convicts.

Sa 144 ka mga ex-convict sa rehiyon, 41 pa lang ang nag-surrender sa police, 20 sa ila ang ara na sa kustodiya sang BJMP 6.