Pagsaylo sa Sablayan Prison and Penal Farm sa mga ex-convicts sa Western Visayas nga nag-surrender kasunod sang GCTA controversy, wala pa petsa –BJMP 6

By: Aine Grace Bravo | September 17, 2019

via Hotline

Pototan, Iloilo — Wala pa sang petsa sa pag-transfer sa Sablayan Prison and Penal Farm sa Occidental Mindoro sa 20 ka mga ex-convicts nga gin-custody sa Iloilo District Jail- Male Dormitory sa Nanga, Pototan.

Ini kasunod nga wala madayon ang pagsaylo sa mga ex-convicts kagab-i, Setyembre 16.

Suno kay Jail Inspector Henry Harder, head sa Operation Division sang Bureau of Jail Management and Penology 6, nagahulat pa sila sa iban pa nga ex-convicts nga i-refer sang kapulisan para isa lang kagasto sa pag-transfer.

Ang BJMP suno sa iya ang maabaga sa kagastuhanan sa pag-transfer sa mga ex-convicts.

Posible nga isaylo ang mga natungdan antes matapos ang 15 ka adlaw nga liberty time nga ginhatag ni Presidente Rodrigo Duterte sa Setyembre 19.

20 na ka mga nag-surrender nga ex-convicts ang gin-custody sa IDJ.

15 sa amo nga numero ang halin sa probinsiya sang Iloilo kag nagdugang ang apat nga halin sa Negros Occidental kag isa nga halin sa Antique.