28 ex-convicts nga gin-custody sang BJMP 6 sa Pototan, ginbiyahe na sa Sablayan Prison and Penal Farm sa Occidental Mindoro

By: Aine Grace Bravo | September 19, 2019

via Aljohn Torreta

Iloilo — Gindala na sa Sablayan Prison and Penal Farm sa Occidental Mindoro ang 28 ka mga ex-convicts nga ara sa kustodiya sang Bureau of Jail Management and Penology (BJMP) 6.

Ginkumpirmar ni Jail Inspector Henry Harder, chief sang Operations Division sang BJMP 6, nga las otso kagab-i, ginbiyahe halin sa Iloilo District Jail-Male Dormitory sa Barangay Nanga, Pototan ang 28 ka mga ex-convicts.

20 sa amo nga numero ang halin sa probinsya sang Iloilo; apat sa Negros Occidental kag tag-duha sa Antique kag Capiz.

Suno kay Harder, gindala na nila sa Occidental Mindoro ang mga ex-convicts nga ila gin-kustodiya matapos nag-abiso ang BJMP Legal Division nga kinahanglan sila dal-on subong nga Setyembre 19, katapusan sang 15 ka adlaw nga ginhatag nga period ni Presidente Rodrigo Duterte para mag-surrender ang mga heinous crime convicts nga na-release bangud sa good conduct time allowance (GCTA).

Buwas pa i-turn-over sang Police Regional Office 6 sa BJMP 6 facility ang pila pa ka mga nag-surrender nga ex-convict sa ila.

Akomodaron naman sang BJMP 6 ang dal-on sang mga pulis sa ila nga dugang nga mga ex-convicts.