Air quality sa Iloilo, wala sang problema sa pihak sang haze alert sa pila ka parte sang Visayas – EMB 6

By: Aine Grace Bravo | September 20, 2019

via Hotline

Iloilo City — Hugot ang monitoring nga ginahimo sang Environmental Management Bureau (EMB) 6 sa kaledad sang hangin sa rehiyon kasunod man sang haze alert bangud sang forest fires sa Indonesia.

Base sa pinaka-ulihi nga monitoring sang EMB 6, naglab-ut sa 51 micrograms per normal cubic meter ang total suspended particulate (TSP) nga ila natakos sa La Paz samtang 37 mg/ncm naman sa Oton.

Suno kay Atty. Ramar Pascua, director sang EMB 6, sa amo nga mga areas nagbutang sang air quality monitoring stations ang EMB 6. May duha pa ka stations pero wala pa naga-function ang equipment sa Leganes kag San Agustin.

Manubo ini suno sa iya sang sa standard TSP nga 230 mg/ncm.

Mas mataas naman ang haze content sa Negros Occidental matapos naka-record ang EMB sang pinakamataas nga 126 mg/ncm sang gintakos nila ang Particulate Matter (PM) 10 kahapon.

Sang nagligad nga mga inadlaw, nag-level sa standard nga 150 mg/ncm ang PM10 sa Negros pero nagnubo sa 126 mg/ncm kahapon.

Mas gagmay ang PM10 sang sa TSP suno kay Pascua. Ang PM10 indi na makita sang “naked eye.”

Ang ordinaryo nga yab-uk suno kay Pascua, ma-filter pa sang buhok sa ilong pero ang PM10 puwede magdiretso sa baga kag sa sistema sang lawas kun mahaklo.

Una na nagpanugyan ang mga otoridad sa Cebu sa mga pumuluyo nga magsuksok sang masks agud maproteksyunan ang ila kaugalingon batok sa haze nga halin sa forest fires sa Sumatra kag Kalimantan regions sa Indonesia.