2 patay sang nakabunggo ang ila motorsiklo sa Ceres bus kag nalasakan pa gid sang nagasunod nga salakyan sa Miag-ao

By: JoMaque | Setyembre 21, 2019, 9:24am

Miag-ao, Iloilo—Pareho nga patay ang driver sang motorsiklo kag iya backrider matapos nakabunggo sa Ceres bus kag nalasakan pa gid sang nagasunod nga salakyan malapit sa plaza sang Miag-ao.

Ginkilala ni Police Captain Hermogenes Eulatic, hepe sang Miag-ao Police Station ang napatay kay Jude Ebot, 23-anyos sang Barangay Igpuro, Miag-ao kag grade 12 student.

Gindala naman sa Western Visayas Medical Center ang driver sang motorsiklo nga ginkilala kay Jan Candelon, 19-anyos sang Barangay Mat-y sang amo man nga banwa kag air craft maintenance student apang napatay.

Suno kay Captain Eulatic, nawasak ang ulo kag wilwig ang wala nga tiil ni Ebot samtang nautod ang tiil ni Candelon.

Sa imbestigasyon sang Miag-ao Police, nakabunggo ang motorsiklo sa Ceres bus nga ginamaneho ni Jully Credo sang Antique antes ginpahayag nalasakan sang depasahero nga jeep nga ginamaneho ni Ariel Fundales sang Miag-ao.

Ginpanghiwala naman ni Fundales nga nalasakan sang jeep niya ang mga biktima.

Gin-custody sang pulis ang duha ka driver.