DepEd, DPWH, may pinakadaku nga pondo sa proposed 2020 National Budget nga ginpasar sang kamara – Cong. Defensor

By: JoMaque | Setyembre 22, 2019, 8:22am

Iloilo – Aprubado na sa Kamara sa third and final reading ang proposed P4.1 trillion 2020 national budget.

Ginkumpirmar ni 3rd District of Iloilo Cong. Lorenz Defensor nga gin-aprubahan kagab-i, Setyembre 20, ang proposed national budget sa masunod nga tuig.

Temprano pa suno kay Defensor nga gin-aksyonan sang Kamara ang proposed budget agud indi masulit ang natabu sang nagligad nga tuig sa diin na-delay ang pag-aprubar rason nga nag-operate ang gobyerno sa reenacted budget sa pagsugod sang 2019.

Ginpanginwala niya man ang mga espekulasyon nga madasig ang pagpasar sang proposed budget bangud may pork barrel para sa mga mamalidha.

Suno sa kongresista, gintun-an sang maayo ang budget sang kada departamento, lakip na sa Executive Department, kag wala sang insertions nga nakita.

‘MAY PINAKADAKU NGA BUDGET’

Department of Education (DepEd) ang may pinakadaku nga budget sa proposed 2020 national budget nga nagalab-ut sa P673 billion.

Nagapangaduha naman ang Department of Public Works and Highways (DPWH) nga may P534 billion budget agud mapadayon ang paggasto sa Build, Build, Build program sang administrasyon.

Sulod man sa may pinakadaku nga budget sa masunod nga tuig ang Department of Health (DOH), Department of Interior and Local Government (DILG) kag Department of National Defense (DND).

Ipasa na sang Kamara sa Senado ang budget para sa review.

Ginalauman nga ma-aprubahan sang Senate kag Congress bicameral committee ang 2020 budget antes matapos ang tuig.