Salakyan sang babaye nga ginbuno sang iya ginpahayag karelasyon nga tomboy sa Dingle, nakita sa Antique; Biktima, nakaguwa na sa ospital samtang suspek, padayon nga ginapangita

By: JoMaque | Setyembre 22, 2019, 8:24am

Dingle Iloilo— Nakita sa San Jose, Antique ang salakyan sang babaye nga ginbuno sang iya ginpahayag karelasyon nga tomboy sa Dingle.

Suno kay PCPT Fernando Punzalan Jr, hepe sang Dingle MPS, Setyembre 13 sang udto sang natabu ang pagbuno kay alyas Chen, 28 anyos sang Dueñas kag bata sang retirado nga pulis.

Base sa pagpangusisa sang mga pulis, papuli na sanday Chen kag Adilyza Castro sa Dueñas sang may ginbaisan sila.

Ginpahayag ni Punzalan nga posible gin-awayan sang duha ang tuyo na nga pagpakigbulag sang biktima sa suspek.

Ginpapondo ni Chen ang salakyan pag-abot sa Barangay Tabugon, Dingle agud maka-istoryahanay sila sang maayo ni Castro, pero ginbuno siya.

Nakahingagaw guwa sa salakyan ang biktima nga may pilas sa liog kag tiyan, kag nakapangayo sang bulig.

Sang nakita sang suspek nga ginbuligan sang mga residente si Chen, nagpalagyo siya dala ang salakyan sang biktima.

Na-recover ang salakyan ni Chen sa San Jose, Antique sa follow-up operation.

Suno sa mga tambay, pila ka adlaw na nga naka-park sa higad sang karsada ang salakyan.

Posible nga magapangatubang sang kaso nga frustrated murder kag carnapping si Castro suno kay Punzalan. Padayon nga ginapangita ang suspek.

About Post Author

Aksyon Radyo Iloilo 720Khz

admin@aksyonradyoiloilo.com.ph

http://aksyonradyoiloilo.com.ph

Happy

0 0 %

Sad

0 0 %

Excited

0 0 %

Sleepy

0 0 %

Angry

0 0 %

Surprise

0 0 %