Ginapatihan miembro sang NPA, patay sa engkwentro sa Miag-ao

By: Aine Grace Bravo | September 23, 2019

via Aljohn Torreta

Miag-ao, Iloilo — Patay ang lalaki nga ginapatihan miembro sang New People’s Army sa engkwentro sang mga rebelde kag Philippine Army sa Barangay Ongyod, pasado las otso kaina sang aga.

Suno kay Captain Cenon Pancito III, Spokesperson sang 3rd Infantry Division, ang ginabanta 15 ka rebelde nga na-engkwentro, amo man ang naka-engkwentro sang mga suldado sa nasambit nga barangay sang Byernes, Setyembre 20.

Napilasan naman si Sergeant Janny Labrador sang 61st Infantry Battalion.

Estable na ang kondisyon ni Labrador nga may pilas sa magtimbang nga pa-a.

Padayon ang pursuit operation sang mga suldado sa mga rebelde nga ginapatihan yara pa sa lugar.

Wala pa nakilala ang napatay.

Pasado las-sais kaina sang aga, may engkwentro man sa tunga sang mga CAFGU active auxiliary kag ginapatihan mga rebelde sa Barangay Dagami, Maasin.

May nabati-an na nga mga lupok sang pusil malapit sa lugar kagab-i, Setyembre 22.