Viral: Tatlo ka lalaki nga nakatampi sang tuwalya samtang naga-order sa fast-food chain sa mall sa Iloilo City, nakuhaan sang litrato

By: Aine Grace Bravo | September 23, 2019\

via Hotline

Iloilo City — Kabahin sang social experiment sang tatlo ka mga lalaki nga lunsay estudyante sang isa ka eskwelahan sa siyudad ang pagbakal nila nga nakatampi lang sang tuwalya sa fast food chain sa SM City.

Suno kay Quennie Verde, nagkuha sang pictures nga nag-viral sa social media, natabu ini pasado ala una sang hapon sang Setyembre 21.

Nakibot suno sa iya ang mga yara sa sulod sang McDonald’s sang nagsulod ang tatlo nga lunsay nakatampi sang pula, puti kag may heart nga tuwalya.

Upod nila ang ila cameraman.

Ginpahayag ni Quennie nga wala man ginpalapitan sang guwardiya ang tatlo.

Suno kay Quennie, seryoso ang tatlo samtang naga-order bisan pa nga ginatulok sila sang mga tawo sa palibot.

Nagguwa man ang tatlo sa fastfood chain pagkatapos nila order.

‘INAPPROPRIATE’

Sa pagpangusisa sang Aksyon Radyo sa management sang mall, ginpahayag nga wala sang may nakalusot sa entrances nga naka-tuwalya na sang Setyembre 21.

Ginapatihan nga nag-ilis lang kag nagtampi sang tuwalya sa comfort room ang tatlo antes nagkadto sa fast food chain.

Gina-imbestigaran sang SM City management ang natabu bangud sang ginpahayag indi nagaka-angay nga suksok sang tatlo ka lalaki samtang yara sa mall.