Commander ang 2nd IPMFC sa Sara, nanindugan nga nagpalupok sang pusil ang driver sang motorsiklo nga gintiro patay sang pulis sa checkpoint

By: Aine Grace Bravo | September 24, 2019

via Aljohn Torreta

Sara, Iloilo — Ginpanindugan sang commander sang 2^nd Iloilo Provincial Mobile Force Company nga nagpalupok sang pusil ang driver sang motorsiklo sang naglabay sa ila checkpoint sa Barangay Zerrudo pasado las-11 kagab-i, Setyembre 23.

Suno kay PLTCOL Mario Baquiran, nag-U-turn ang motorsiklo nga ginamaneho ni Adonis Hontiveros Jr, 26 anyos sang Barangay Pinantan Elizalde, Ajuy, sang ginparahan sang mga pulis nga naga-checkpoint.

Nakalukso suno kay Baquiran ang 17-anyos nga solterito nga angkas ni Hontiveros antes nag-U-turn ang motorsiklo.

Ginabanta 30 metros na ang distansya ni Hontiveros sa mga pulis sang ginpahayag nga nagpalupok siya sang pusil matapos gin-flag down liwat sang mga pulis. Gintiro suno kay Baquiran ni Hontiveros ang pulis rason gintiro man siya sang isa pa gid ka pulis.

Gindala pa sa Sara District Hospital si Hontiveros pero napatay bangud sang pilas sa likod.

Na-recover sa checkpoint area ang 45 caliber, tatlo ka bala kag isa ka empty shell.

Una na ginsaysay ni Tony Boy nga angkas ni Hontiveros nga halin man sila sa ospital kag papuli na sa Ajuy sang nakalabay sa checkpoint.