ArchivesLokal

Ginapatihan NPA rebel nga nasapwan patay kasunod sang engkwentro sa Miag-ao, nakilala na

By: Aine Grace Bravo | September 24, 2019

via Aljohn Torreta

Miagao, Iloilo — Nakilala na ang lalaki nga napatay sa engkwentro sa tunga sang ginapatihan miembro sang New People’s Army kag Philippine Army sa Barangay Ongyod, Miagao kahapon, Setyembre 23.

Suno kay Captain Cenon Pancito III, Spokesperson sang 3rd Infantry Division sang Philippine Army, ang napatay amo si Vincent Yovero, residente sang Barangay To-og, Miagao.

Nakilala si Yovero paagi sa listahan sang Philippine Army sang mga suspected NPA members kag mga pahayag sang mga sources nila.

Ang nasambit nga barangay ang malapit lang sa lugar sa diin nagluntad ang engkwentro.

Ginkumpirmar man ni Pancito nga miembro si Yovero sang Suyak Platoon, Southern Front, Kilusang Rehiyon-Panay sang NPA.

Ang amo nga listahan ang nakabase naman sa impormasyon halin sa nag-surrender nga mga rebelde kag iban pa nga source sang Philippine Army.

Gindala sa punerarya sa Miagao ang bangkay.

Ginatinguhaan pa sang Aksyon Radyo Iloilo nga makuhaan sang pahayag ang pamilya ni Yovero.